FURAHA YA KIKATOLIKI / JOY OF THE CATHOLIC LIFE

KIZAZI CHENYE KUWAJIBIKA.

“ASALI ITOKAYO MWAMBANI”

Jumamosi, Novemba 7, 2026

Juma la 31 la Mwaka wa Kanisa

Fpl 4:10-19;

Zab 111:1-2, 5-6, 8-9;

Lk 16:9-15

KIZAZI CHENYE KUWAJIBIKA.

Kutambulishwa na kukuwa kwa teknologia imeleta msaada mkubwa sana katika maisha yetu ya kila siku, lakini kwa upande mwingine ni kama imetukata mikono. Tunaona watu wengi muda mwingi wakiwa na simu zao, tableti na kompyuta wakiangalia facebook, meseji za whatsapp, Twitta nk. Tunaona watu wanashugulika zaidi na simu kuliko watu walionao karibu. Mbaya zaidi wengine wakichati hata wakati ule wakula kwenye familia, au hata wakiwa wamealikwa kwenye sherehe watu hawaongei tena, wako bize na sumu zao. Mikono yetu imekatwa na teknologia hatuwezi tena kusaidia wengine, na wala hatuna tena muda wakuongea kijumuiya. Tumetekwa kifikra na kiakili hatuweze kuongea na wenzetu walio karibu nasi, tukiulizwa swali tunasema tuu ndio au hapana na wala hatujui kwanini tumesema hivyo, kwasababu akili na mawazo yetu hayapo pamoja na wengine walio karibu. Tunaishia kwenye ubinafsi. Kuhusu hili limewashika wengi na ni vizuri kujichunguza, tunapoteza ile furaha na upendo wa kuongea na ndugu walio karibu nasi.

Ni dhahiri kwamba, tuna tabia ya kutupa ya zamani na kutaka mapya. Nguo mpya, simu mpya, magari mapya nk. Sasa tunataka kutupa tamaduni zetu njema na kuiga tamaduni zinazo haribu asili yetu kama wanadamu. Tunadharau hata tamaduni zetu zenye maadili mema tukidhani mambo mapya ndiyo yenye maana.

Masomo ya leo yanatualika tuwe mawakili waaminifu katika kutumia vitu vyetu tulivyonavyo. Je, vitu vyetu vinatuweka karibu na Mungu au ndio vinafuta hata kile kidogo nilichonacho? Tumetumia vipaji, zawadi na mali zetu na wengine? Je tumekuwa watumwa wa vitu tulivyo navyo? Hatuna wasi wasi kwamba mali tulionayo ni Baraka kutoka kwa Mungu kama tumeyapata kwa haki na maadili mema. Kwanza kabisa kama Wakristo, tunapaswa kutumia vyote tulivyo navyo kwa faida ya wengine. Pili, kama mmoja akiwa mwaminifu katika kushirikisha ya duniani, Mungu pia atamshirikisha utajiri wa Mbinguni. Na tatu, tutambue utajiri wa duniani una thamani ya duniani.

Paulo anakiri kwamba, Wafilipi wamekuwa Kanisa pekee lililokuwa na ukarimu kwa mali zao wakati akiwa gerezani, akipata mateso. Walimpatia msaada kila mara. Na zaidi sana, ilikuwa ni sadaka safi yenye kumpendeza Bwana. Je, waliitikia vipi kuhusu mahitaji ya Paulo akiwa gerezani? Walikusanya mchango kwa upendo na kumpa Epafra, ampelekee Paulo mahitaji. Na mwisho kabisa walilisaidia kanisa na kutumia utajiri wao kwa ajili ya wengine.

Sala: Bwana, nisaidie mimi niweze kuwa muwajibikaji wa kushirikisha nilivyo navyo utajiri wa mali na utajiri wa kiroho. Amina

MASOMO YA MISA, NOVEMBA 7, 2026

MASOMO YA MISA, NOVEMBA 7, 2026

JUMAMOSI, JUMA LA 31 LA MWAKA WA KANISA

SOMO 1

FLP 4:10 – 19

Nalifurahi sana katika Bwana, kwa kuwa sas mwisho mmehuisha tena fikira zenu kwa ajili yangu, kama vile mlivyokuwa mkinifiriri hali yangu; lakini hamkupata nafasi. Si kwamba nasema haya kwa kuwa nina mahitaji; maana nimejifunza kuwa radhi na hali yoyote niliyo nayo. Najua kudhiliwa, tena najua kufanikiwa; katika hali yoyote, na katika mambo yoyote, nimefundishwa kushiba na kuona njaa, kuwa na vingi na kupungukiwa. Nayaweza mambo yote katika yeye atiaye nguvu. Lakini mlifanya vema, mliposhiriki nami katika dhiki yangu.

Nanyi pia, ninyi wenyewe mnajua, enyi Wafilipi ya kuwa katika mwanzo wa Injili, nilipotoka Makedonia, hakuna kanisa linguine lililoshirikiana nami katika habari hii ya kutoa na kupokea, ila ninyi peke yenu. Kwa kuwa hata huko Thesalonike mliniletea msaada kwa mahitaji yangu, wala si mara moja. Si kwamba nakitamani kile kipawa bali nayatamani mazao yanayozidi kuwa mengi katika hesabu yenu. Lakini ninavyo vitu vyote na kuzidi, tena nimejaa tele; nimepokea kwa mkono wa Epafrodito vitu vile vilivyotoka kwenu, harufu ya manukato, sadaka yenye kibali, impendezayo Mungu. Na Mungu wangu atawajazeni kila mnachokihitaji kwa kadiri ya utajiri wake, katika utukufu, ndani ya Kristo Yesu. Sasa atukuzwe Mungu, Baba yetu, milele na milele. Amina.

Neno la Bwana… Tumshukuru Mungu.

WIMBO WA KATIKATI

ZAB. 112:1 – 5 (K) 1

(K) Heri mtu yule amchaye Bwana.

Aleluya,

Heri mtu yule amchaye Bwana,

Apendezwaye sana na maagizo yake,

Wazao wake watakuwa hodari duniani,

Kizazi cha wenye adili kitabarikiwa. (K)

Heri atendaye fadhili na kukopesha,

Atengenezaye mambo yake kwa haki.

Kwa maana hataondoshwa kamwe,

Mwenye haki atakumbukwa milele. (K)

Moyo wake umethibitika hataogopa,

Amekirimu, na kuwapa maskini,

Haki yake yakaa milele,

Pembe yake itatukuzwa kwa utukufu. (K)

SHANGILIO

Yn. 13:13

Aleluya, aleluya,

Bwana anasema: Siwaiti tena watumwa, lakini ninyi nimewaita rafiki, kwa kuwa yote niliyoyasikia kwa Baba yangu nimewaarifu.

Aleluya.

INJILI

Lk. 16:9-15

Yesu aliwaambia wanafunzi wake: Jifanyieni rafiki kwa mali ya udhalimu, ili itakapokosekana wawakaribishe katika makao ya milele. Aliye mwaminifu katika lililo dogo sana, huwa mwaminifu katika lililo kubwa pia; na aliye dhalimu katika lililo dogo, huwa dhalimu katika lililo kubwa pia. Bali, kama ninyi hamkuwa waaminifu katika mali ya udhalimu, ni nani atakayewapa amana mali ya kweli? Na kama hamkuwa waaminifu katika mali ya mtu mwingine, ni nani atakayewapa iliyo yenu wenyewe?

Hakuna mtumishi awezaye kutumikia mabwana wawili; kwa maana, ama atamchukia huyu au kumpenda huyu, ama atamshikamana na huyu na kumdharau huyu. Hamwezi kumtumikia Mungu na mali.

Neno la Bwana… Sifa kwako Ee Kristo.

Copyright © 1993 T.M.P. Book Department, Tabora - Tanzania: see MASOMO YA MISA. Scripture readings from ‘Biblia Takatifu’are published and copyright © 1975, 1993 by T.M.P. Book Department, Tabora – Tanzania.© Bible Society of Kenya, © Bible Society of Tanzania.These readings are a reproduction by Furaha ya Kikatoliki: see www.fur-kat.blogspot.com.

RAIA WA MBINGUNI

“ASALI ITOKAYO MWAMBANI”

Ijumaa, Novemba 6, 2026

Juma la 31 la Mwaka wa Kanisa

Fpl 3:17 - 4:1

Zab 121:1-5

Lk 16:1-8

RAIA WA MBINGUNI

Katika Masomo ya leo, Mt. Paulo anawaambia Kanisa la Wafilipi na sisi leo pia, ni sifa zipi za raia Mkristo anayeishi katika Ulimwengu huu. Kwanza, wanapaswa kuiga sheria njema za Kikristo (mstari 17), pili, waachane na mambo ya ulimwengu yalio adui wa msalaba (mstari 18-19) na tatu, wakumbuke kwamba uraia wao halisi upo mbinguni (mstari 19). Kwa hayo yatawafanya wawe raia wema hapa duaniani (Mstari20-21). Paulo, bila kuwa na hofu anawaambia Wafilipi waige na wafuate mfano wake wa kuwa na imani, na hivyo hawata yumbishwa na kupoteza njia yao na wale wapotoshaji. Maelekezo ya Paulo jinsi ya kuwa raia wa mbinguni yanatufaa nasi leo hii katika maisha yetu. Sisi pia, tunaweza kuiga na kuishi namna yake ya kujikatalia na kuamini na furaha ya kujitoa sadaka. Ifikie mahali tuweze kusema kama Paulo tena kwa ujasiri kwamba watu waige Imani yetu tulio nayo kwa Kristo.

Sala: Baba wa mbinguni, tusaidie kila wakati tutambue kuwa sisi ni raia wa mbunguni na tuishi kwa mfano wa Kristo na mifano mingine katika kanisa lako. Amina.

MASOMO YA MISA, IJUMAA, NOVEMBA 6, 2026

MASOMO YA MISA, IJUMAA, NOVEMBA 6, 2026

JUMA LA 31 LA MWAKA WA KANISA

SOMO 1

Flp 3:17—4:1

Ndugu zangu, mnifuate mimi, mkawatazame wao waendao kwa kuufuata mfano tuliowapa ninyi. Maana wengi huenenda, ambao nimewaambieni mara nyingi habari zao, na sasa nawaambia hata kwa machozi, kuwa ni adui za msalaba wa Kristo; mwisho wao ni uharibifu, mungu wao ni tumbo, utukufu wao u katika fedheha yao, waniao mambo ya duniani. Kwa maana sisi, wenyeji wetu uko mbinguni; kutoka huko tena tunamtazamia Mwokozi, Bwana Yesu Kristo; atakayeubadili mwili wetu wa unyonge, upate kufanana na mwili wake wa utukufu, kwa uweza ule ambao kwa huo aweza hata kuvitiisha vitu vyote viwe chini yake. Basi, ndugu zangu, wapendwa wangu, ninaowaonea shauku, furaha yangu, na taji yangu, hivyo simameni imara katika Bwana, wapenzi wangu.

Neno la Bwana.... Tumshukuru Mungu.

WIMBO WA KATIKATI

Zab 122:1-5

(K) Nalifurahi walipo niambia, na twende nyumbani kwa Bwana

1. Nalifurahi waliponiambia, Na twende nyumbani kwa Bwana.

Miguu yetu imesimama Ndani ya malango yako, Ee Yerusalemu.(K)

2. Ee Yerusalemu uliyejengwa Kama mji ulioshikamana,

Huko ndiko walikopanda kabila, Kabila za Bwana; (K)

3. Ushuhuda kwa Israeli, Walishukuru jina la Bwana.

Maana huko viliwekwa viti vya hukumu,

Viti vya enzi vya mbari ya Daudi.(K)

SHANGILIO

Yn 14:23

Aleluya, aleluya

Mtu akinipenda, atalishika neno langu,

na Baba yangu atampenda, nasi tutakuja kwake.

Aleluya

INJILI

Lk. 16:1-8

Yesu aliwaambia wanafunzi wake: Palikuwa na mtu mmoja, tajiri, aliyekuwa na wakili wake; huyu alishitakiwa kwake kuwa anatapanya mali zake. Akamwita, akamwambia, Ni habari gani hii ninayosikia juu yako? Toa hesabu ya uwakili wako, kwa kuwa huwezi kuwa wakili tena. Yule wakili akasema moyoni mwake, Nifanyeje? Maana, bwana wangu ananiondolea uwakili. Kulima, siwezi; kuomba, naona haya. Najua nitakalotenda, ili nitakapotolewa katika uwakili, wanikaribishe nyumbani mwao.

Akawaita wadeni wa bwana wake, kila mmoja; akamwambia wa kwanza, Wawiwani na bwana wangu? Akasema, Vipimo mia vya mafuta. Akamwambia, Twaa hati yako, keti upesi, andika hamsini. Kisha akamwambia mwingine, Na wewe wawiwani? Akasema, Makanda mia ya ngano. Akamwambia, Twaa hati yako, andika themanini.

Yule bwana akamsifu wakili dhalimu kwa vile alivyotenda kwa busara; kwa kuwa wana wa ulimwengu huu katika kizazi chao wenyewe huwa na busara kuliko wana wa nuru.

Neno la Bwana… Sifa kwako Ee Kristo.

KUPOTEA NA KUPATIKANA!

“ASALI ITOKAYO MWAMBANI”

tafakari ya kila siku

Alhamisi, Novemba 5, 2026,

Juma la 31 la Mwaka wa Kanisa

Flp 3:3-8;

Zab 104:2-7;

Lk 15:1-10

KUPOTEA NA KUPATIKANA!

Je ni ujumbe ghani anaotaka kutuambia Yesu kuhusu Mungu na ufalme wake katika mfano wa kondoo aliyepotea na shilingi iliyopotea? Wote wawili, Mchungaji na Mama mwenye nyumba, “wanatafuta mpaka wapate kilicho potea”. Wanatafuta bila kukata tamaa. Jambo jipya analotaka kutufundisha Yesu ni kwamba wadhambi ni lazima watafutwe warudi sio kuwaombolezea. Mungu hafurahii kupotea kwa mtu yeyote, bali anatamani wote wakombolewa wawe na uhusiano naye tena. Ndio maana jumuiya yote ya Mbinguni hufurahi juu ya mwenye dhambi mmoja anapopatikana na kurudisha uhusiano wake na Mungu kwa kutubu. Watafuta roho za waliopotea leo hii wanahitajika sana. Je, tunasali bila kuchoka na kutafuta kuwarudisha waliopotea katika njia ya kumwelekea Mungu? Au tunafurahia kupotea kwa mwenzetu? Kushindwa kufurahia mafanikio ya wenzetu ni dhahiri kwamba tunafurahia upande mwingine wa kupotea kwake. Daima tujifunze kuwarudisha watu kwa Mungu, tuwaombee na kuwatia moyo ili sote tushikane mikono tuende kwa Mungu.

Sala: Bwana, naomba mwanga wako uondoe giza ili kile kilichopotea kipatikane. Nijaze kwa upendo

wako wakubadilisha mioyo yetu ili niweze kuwa na huruma kama wewe ulivyo na huruma. Amina.

MASOMO YA MISA, NOVEMBA 5, 2026

ALHAMISI, JUMA LA 31 LA MWAKA

SOMO 1

Flp. 3:3 – 8

Sisi tu tohara, tumwabuduo Mungu kwa roho, na kuona fahari juu ya Kristo Yesu, wala hatuutumaini mwili. Walakini mimi ningeweza kuutumainia mwili. Mtu yeyote akijiona kuwa anayo sababu ya kuutumainia mwili, mimi zaidi. Nalitahiriwa siku ya nane, ni mtu wa taifa la Israeli, wa kabila ya Benyamini, Mwebrania wa Waebrania, kwa habari ya kuishika torati, ni Farisayo, kwa habari ya juhudi, mwenye kuliudhi Kanisa, kwa habari ya haki ipatikanayo kwa sheria sikuwa na hatia. Lakini mambo yale yaliyokuwa faida kwangu, naliyahesabu kuwa hasara kwa ajili ya Kristo. Naam, zaidi ya hayo, nayahesabu mambo yote kuwa hasara kwa ajili ya uzuri usio na kiasi wa kumjua Kristo Yesu, Bwana wangu.

Neno la Bwana… Tumshukuru Mungu.

WIMBO WA KATIKATI

Zab. 105:2 – 7 (K) 3

(K) Ufurahi moyo wao wamtafutao Bwana.

Mwimbieni, mwimbieni kwa zaburi,

Zitafakarini ajabu zake zote.

Jisifuni kwa jina lake takatifu,

Na ufurahi moyo wao wamtafutao Bwana. (K)

Mtakeni Bwana na nguvu zake,

Utafuteni uso wake sikuzote.

Zikumbukeni ajabu zake alizozifanya,

Miujiza yake na hukumu za kinywa chake. (K)

Enyi wazao wa Ibrahimu, mtumishi wake,

Enyi wana wa Yakobo, wateule wake.

Yeye Bwana, ndiye Mungu wetu,

Duniani mwote mna hukumu zake. (K)

SHANGILIO

Yn. 10:27

Aleluya, aleluya,

Kondoo wangu waisikia sauti yangu, nami nawajua, nao wanifuata.

Aleluya.

INJILI

Lk. 15:1-10

Watoza ushuru wote na wenye dhambi walikuwa wakimkaribia Yesu wamsikilize. Mafarisayo na waandishi wakanung’unika, wakisema, Mtu huyu huwakaribisha wenye dhambi, tena hula nao. Akawaambia mfano huu, akisema, Ni nani kwenu, mwenye kondoo mia, akipotewa na mmojawapo, asiyewaacha wale tisini na kenda nyikani, aenda akamtafute yule aliyepotea hata amwone? Naye akiisha kumwona, humweka mabegani pake akifurahi. Na afikapo nyumbani kwake, huwaita rafiki zake na jirani zake, akawaambia, Furahini pamoja nami, kwa kuwa nimekwisha kumpata kondoo wangu aliyepotea. Nawaambia, Vivyo hivyo kutakuwa na furaha mbinguni kwa ajili ya mwenye dhambi mmoja atubuye, kuliko kwa ajili ya wenye haki tisini na kenda ambao hawana haja ya kutubu.

Au kuna mwanamke gani mwenye shilingi kumi, akipotewa na moja, asiyewasha taa na kufagia nyumba, na kutafuta kwa bidii hata aione? Na akiisha kuiona, huwaita rafiki zake na jirani zake, akawaambia, Furahini pamoja nami, kwa kuwa nimeipata tena shilingi ile iliyonipotea. Nawaambia, Vivyo hivyo kuna furaha mbele ya malaika wa Mungu kwa ajili ya mwenye dhambi mmoja atubuye.

Neno la Bwana… Sifa kwako Ee Kristo.

GHARAMA YA KUWA MFUASI!

“ASALI ITOKAYO MWAMBANI”

Tafakari ya Kila siku

Jumatano, Novemba 4, 2026.

Juma la 31 la Mwaka

Kumbukumbu ya Mtakatifu Karoli Boromeo

Flp: 2:12-18;

Zab 27: 1.4.13-14,

Lk 14: 25-33.

GHARAMA YA KUWA MFUASI!

Katika injili ya Luka, tunaona Yesu yupo njiani kuelekea Yerusalemu. Ndani ya akili yake akiwa amejaa na kuhusu mateso, kifo na ufufuko ambavyo vingempata. Umati ulikuwa ukitembea pamoja naye lakini katika ukweli ulikuwa hautembei naye. Umati ulikuwa ukidhani kwamba Yesu amekuja kuwakomboa kutoka katika magonjwa, upungufu wa fedha na utawala wa Kirumi. Yesu anawakumbusha umati kitu ambacho kinahitajika ili waweze kutembea naye katika hali ya ukweli na mafanikio. Anawaambia kwamba ufuasi sio kazi rahisi ya kuomba. Kumfuata yeye inampasa mmoja kuacha ndugu hata wa familia na kumfuata, baba, mama, mwenzi wa ndoa, watoto nk. Kwa maneno mengine kumfuata Yesu tunapaswa tumuweke wa kwanza zaidi ya kitu kingine.

Yesu anaelezea mambo matatu katika ufuasi: kuachana na kujishika na familia, kukutana na kujikatalia binafsi na kuachia mali. Anawaalika wale wote ambao watamfuata yeye waweze kukubali na kutopata heshima na kupata mateso. Mfuasi kamili wa Yesu hatafuti faraja, kufarijiwa na marafiki, wala kubakiza maisha yake. Hivyo ufuasi sio rahisi, kuna gharama isio isha. Je, mimi na wewe tupo tayari kulipa gharama hiyo?

Sala: Bwana Yesu, nisaidie niweze kuona vile vitu vyote vinavyo nizuia mimi nishindwe kukupenda wewe. Nikiwa ninatambua kitu ambacho kinanitoa kwenye Imani, nipe ujasiri niweze kukuchagua wewe zaidi ya kitu kingine. Nipe hekima niweze kutambua ni kwa jinsi ghani naweza kukuchagua wewe zaidi ya kitu chochote. Yesu, nakuamini wewe. Amina

MASOMO YA MISA NOVEMBA 4, 2026

MASOMO YA MISA NOVEMBA 4, 2026

JUMATANO, JUMA LA 31 LA MWAKA WA KANISA

KUMBUKUMBU YA MTAKATIFU KAROLI BOROMEO

SOMO 1

Flp. 2:12-18

Wapendwa wangu, kama vile mlivyotii sikuzote, si wakati mimi nilipokuwapo tu, bali sasa zaidi sana mimi nisipokuwapo, utimizeni wokovu wenu wenyewe kwa kuogopa na kutetemeka. Kwa maana ndiye Mungu atendaye kazi ndani yenu, kutaka kwenu na kutenda kwenu, kwa kulitimiza kusudi lake jema.

Yatendeni mambo yote pasipo manung’uniko wala mashindano, mpate kuwa wana wa Mungu wasio na lawama, wala udanganyifu, wasio na ila kati ya kizazi chenye ukaidi, kilichopotoka; ambao kati ya hao mnaonekana kuwa kama mianga katika ulimwengu, mkishika neno la uzima; nipate sababu ya kuona fahari katika siku ya Kristo, ya kuwa sikupiga mbio bure wala sikujitaabisha bure. Naam, hata nikimiminwa juu ya dhabihu na ibada ya imani yenu, nafurahi; tena nafurahi pamoja nanyi nyote. Nanyi vivyo hivyo furahini, tena furahini pamoja nami.

Neno la Bwana… Tumshukuru Mungu.

WIMBO WA KATIKATI

Zab. 27:1,4,13-14 (K) 1

(K) Bwana ni nuru yangu na wokovu wangu.

Bwana ni nuru yangu na wokovu wangu,

Nimwogope nani?

Bwana ni ngome ya uzima wangu,

Nimhofu nani? (K)

Neno moja nimelitaka kwa Bwana,

Nanlo ndilo nitakalolitafuta,

Nikae nyumbani mwa Bwana

Siku zote za maisha yangu.

Niutazame uzuri wa Bwana,

Na kutafakari hekaluni mwake. (K)

Naamini ya kuwa nitauona wema wa Bwana

Katika nchi ya walio hai.

Umngoje Bwana, uwe hodari,

Upige moyo konde, naam, umngoje Bwana. (K)

SHANGILIO

Lk. 8:15

Aleluya, aleluya,

Wanabarikiwa wale ambao kwa unyofu na wema wa mioyo yao hulisikia neno la Mungu na kulishika.

Aleluya.

INJILI

Lk. 14:25-33

Makutano mengi walipokuwa wakifuatana na Yesu, aligeuka, akawaambia, Kama mtu akija kwangu naye hamchukii baba yake, na mama yake, na mke wake, na wanawe, na ndugu zake waume kwa wake, na wanawe, na ndugu zake waume kwa wake; naam, na hata nafsi yake mwenyewe, hawezi kuwa mwanafunzi wangu. Mtu yeyote asiyeuchukua msalaba wake na kuja nyuma yangu, hawezi kuwa mwanafunzi wangu.

Maana ni nani katika ninyi, kama akitaka kujenga mnara, asiyeketi kwanza na kuhesabu gharama, kwamba anavyo vya kuumalizia? Asije akashindwa kuumaliza baada ya kuupiga msingi, watu wote waonao wakaanza kumdhihaki, wakisema, Mtu huyu alianza kujenga, akawa hana nguvu za kumaliza. Au kuna mfalme gani, akitaka kwenda kupigana na mfalme mwingine, asiyeketi kwanza na kufanya shauri, kwamba yeye pamoja na watu elfu kumi ataweza kukutana na yule anayekuja juu yake na watu elfu ishirini? Na kama akiona hawezi, hutuma ujumbe kutaka sharti za Amani, mtu yule akali mbali. Basi, kadhlika kila mmoja wenu asiyeacha vyote alivyo navyo, hawezi kuwa mwanafunzi wangu.

Neno la Bwana… Sifa kwako Ee Kristo.

MAJUKUMU YA KIKRISTO!

“ASALI ITOKAYO MWAMBANI”

Tafakari ya kila siku

Jumanne, Novemba 3, 2026,

Juma la 31 la Mwaka

Flp 2: 5-11;

Zab 22: 25-31;

Lk 14: 15-24.

MAJUKUMU YA KIKRISTO!

Kwetu sisi uhusiano wetu ni sawa na uhusiano wa viungo vya mwili. Kama vile viungo vya mwili vinavyo fanya kazi kwa ushirikiano na kwa umoja, sisi pia ni jumuiya ambayo tunapaswa kukaa na kutenda kwa umoja. Ukuwaji wetu wa ndani unategemea sana jinsi tunavyo fanya kazi pamoja, tukiwa na mtazamo wa Kikristo kwa utukufu mkuu wa Mungu. Hapa tutaiga unyenyekevu wa Kristo mwenyewe kama tunavyo elezwa katika somo la kwanza.

Kwa kufanya hili, tunapaswa kufahamu vitu vitatu vinavyo jenga uhusiano na huduma katika jumuiya ili kujenga mwili wa Kristo: cha kwanza uelewa wa mtu binafsi: kila Mkristo anapaswa kufahamu vipaji vyake alivyopewa na Mungu ili kujenga jumuiya na kanisa kwa ujumla. Hili halina maana ya kujifikiria mwenyewe na kukandamiza vipaji vya wengine. Hili lina maana kutambua pia vipaji vya wengine na mapaji ya wengine katika jumuiya ili jumiya iweze kujengwa katika fadhila za Kikristo, Imani, matumaini na Mapendo. Hili linawezekana kwa fadhila ya unyenyekevu.

Pili: umoja na ushirikiano: kila mkristo anapaswa kuonesha vipaji vyake kwa Imani. Tunaweza tusione matunda mara moja, lakini Mungu anayaona na anayabariki. Mapaji yetu yanapaswa kuletwa pamoja ili kujenga uzuri wa kanisa zima, hili linawezekana tu kwa umoja na kushirikiana katika kweli.

Tatu, uaminifu na ukarimu. Kwa uzuri wa mwili wa Kristo, damu katika mwili huo inapaswa kuwa mapendo na uaminifu. upendo unasaidia viungo vyote/watu wote wafanye kazi kwa umoja. Upendo huu unapaswa kuwa wa kweli sio unafiki.

Katika Injili tunaona wageni walio alikwa walikuwa wamejifunga na mambo yao binafsi, hawakuchukulia mwaliko huu kwa makini, wakitoa sababu za kuwa na vitu, familia na mahusiano binafsi. Sisi pia katika majukumu yetu katika kanisa kujenga mwili huu wa Yesu, huwa tunasababu mbali mbali, mahusiano yetu, mambo yetu binafsi hata tunakataa mwaliko wa Yesu. Leo tunaitwa tuweze kuangalia mambo machache: je, nimetumia kipaji nilicho pewa na Mungu kwa ajili ya Mungu? Je, nimechangia katika kujenga mwili wa Yesu? Je, nimekuwa mtu wa kutoa visingizio na sababu mbali mbali wakati nikiwa nimeitwa kwa majukumu ya kanisa? Je nipo tayari kufanya mabadiliko katika maisha yangu ili niweze kuwa kiungo kinacho fanya kazi pamoja na wengine katika mwili wa Yesu?

Sala: Bwana Yesu, nisaidie mimi niweze kusikia njia mbali mbali unazoniita mimi niweze kushiriki katika maisha ya neema na huruma. Nisaidie niweze kutambua daima karamu ulioniandalia na daima niweze kuweka lengo hilo kuwa la kwanza kabisa. Yesu nakuamini wewe. Amina

MASOMO YA MISA NOVEMBA 3, 2026

MASOMO YA MISA NOVEMBA 3, 2026

JUMANNE, JUMA LA 31 LA MWAKA

SOMO 1

Flp. 2:5-11

Iweni na nia iyo hiyo ndani yenu ambayo ilikuwamo pia ndani ya Kristo Yesu; ambaye yeye mwanzo alikuwa yuna namna ya Mungu, naye hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu; tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya msalaba.

Kwa hiyo tena Mungu alimwadhimisha mno, akamkirimia Jina lile lipitalo kila jina; ili kwa jina la Yesu kila goti lipigwe, la vitu vya mbinguni, na vya duniani, na vya chini ya nchi; na kila ulimi ukiri ya kuwa Yesu Kristo ni Bwana, kwa utukufu wa Mungu Baba.

Neno la Bwana… Tumshukuru Mungu.

WIMBO WA KATIKATI

Zab. 22:25-31 (K) 25

(K) Kwako zinatoka sifa zangu, Ee Bwana.

Nitaziondoa nadhiri zangu

Mbele yao wamchao.

Wapole watakula na kushiba,

Wamtafutao Bwana watamsifu;

Mioyo yenu na iishi milele. (K)

Miisho yote ya dunia itakumbuka,

Na watu watamrejea Bwana;

Jamaa zote za mataifa watamsujudia.

Maana ufalme una Bwana,

Naye ndiye awatawalaye mataifa.

Wakwasi wote wa dunia watakula na kusujudu. (K)

Wazao wake watamtumikia.

Zitasimuliwa habari za Bwana,

Kwa kizazi kitakachokuja,

Nao watawahubiri watakaozaliwa haki yake,

Ya kwamba ndiye aliyeyafanya. (K)

SHANGILIO

Mt. 4:4

Aleluya, aleluya,

Mtu hataishi kwa mkate tu, ila kwa kila neno litokalo katika kinywa cha Mungu.

Aleluya.

INJILI

Lk. 14:15-24

Mmojawapo wa wale walioketi chakulani pamoja na Yesu alimwambia, Heri yule atakayekula mkate katika ufalme wa Mungu. Akamwambia, Mtu mmoja alifanya karamu kubwa, akaalika watu wengi, akamtuma mtumwa wake saa ya chakula awaambie wale walioalikwa, Njoni, kwa kuwa vitu vyote vimekwisha kuwekwa tayari. Wakaanza wote kutoa udhuru kwa nia moja. Wa kwanza alimwambia, Nimenunua shamba, sharti niende nikalitazame; tafadhali unisamehe. Mwingine akasema, Nimenunua ng’ombe jozi tano, ninakwenda kuwajaribu; tafadhali unisamehe. Mwingine akasema, Nimeoa mke, na kwa sababu hiyo siwezi kuja.

Yule mtumwa akaenda, akampa bwana wake habari ya mambo hayo. Basi, yule mwenye nyumba akakasirika, akamwambia mtumwa wake, Toka upesi, uende katika njia kuu na vichochoro vya miji, ukawalete hapa maskini, na vilema, na vipofu, na viwete. Mtumwa akasema, Bwana, hayo uliyoagiza yamekwisha tendeka, n ahata sasa ingaliko nafasi.

Bwana akamwambia mtumwa, Toka nje uende barabarani na mipakani, ukawashurutishe kuingia ndani, nyumba yangu ipate kujaa. Maana nawaambia ya kwamba katika wale walioalikwa, hapana hata mmoja atakayeionja karamu yangu

Neno la Bwana… Sifa kwako Ee Kristo.

Everyday Saint / Maisha ya Watakatifu