FURAHA YA KIKATOLIKI / JOY OF THE CATHOLIC LIFE

UMOJA KATIKA WINGI !

“ASALI ITOKAYO MWAMBANI”

Jumatatu, Oktoba 28, 2026,

Juma la 30 la Mwaka wa Kanisa

Sikukuu ya Wat. Simoni na Yuda, Mitume.

Ef 2:19-22

Zab 18:2-5

Lk 6:12-16

UMOJA KATIKA WINGI !

Mungu humwalika mwanadamu daima katika kazi yake ya ukombozi. Yesu aliwachagua watu wa kawaida kabisa wa kipindi chake kuwa mitume wake. Anawapa nguvu na mamlaka na wakawa waaminifu katika kuendeleza kutimiza mapenzi ya Baba. Luka, anatuambia Yesu alienda mlimani kusali, na alikesha usiku kucha katika kusali. Ndipo baada ya kusali anawachagua mitume kumi na mbili. Na kati ya hao wawili ndio tunafanya sikukuu yao leo, Simoni na Yuda. Habari za hawa wawili zijulikanazo ni chache sana. Tunajua walichaguliwa na Yesu kuwa mitume wake. Mtume ni yule anayetumwa. Hawa walishirikiana kufanya kazi pamoja katika nchi ya Uajemi na huko waliuawa kwa ajili ya Kristo. Kwasababu hiyo sikukuu yao huadhimishwa pamoja. Mtume simoni aliitwa ‘Zeloti’ maana yake mwenye bidii kwasababu alifanya bidii kutangaza ujumbe kuhusu Yesu kokote. Mtume Yuda aliitwa ‘Tadayo’maanake ‘hodari’ili kumtofautisha na Yuda Iskarioti msaliti. Alikuwa ndugu yake Yakobo mdogo kama tunavyosoma katika Injili na kama anavyosema mwenyewe katika barua yake ‘Barua ya Yuda’na barua hii iliandikwa kwa ajili ya makanisa yaliokuwa karibu na nchi Takatifu kama alivyofanya nduguye Yakobo.

Unaweza kufikiria ni watu wa namna ghani aliokuwa nao Yesu. Petro aliyekuwa msemaji na mwenye hofu lakini bado Yesu alimchagua kuongoza. Yakobo na Yohane waliokuwa wakipigania kuwa karibu na Yesu katika ufalme walio utafsiri vibaya; Mathayo mtoza ushuru, nk. Tunaweza kufikiria kukaa kwao pamoja kulikuwa je hapo mwanzo. Pamoja na kutoelewana wao kwa wao waliponywa na upendo usiozuilika wa Yesu alioutoa kwao.

Somo la kwanza linamalizia vizuri kabisa: “tangu sasa ninyi si wageni tena wala wapitaji, bali ni wenyeji pamoja na watakatifu, watu wa nyumbani mwake Mungu”. (Efe 2:19). Je, tupo tayari kumruhusu Yesu atujenge kama watu wa nyumba yake, hata ikiwa nikuwa pamoja na wale tusiowapenda?

Sala: Bwana Yesu, ninaomba upendo wako unipe nguvu kuwakubali wenzangu kama walivyo. Amina.

MASOMO YA MISA OKTOBA 28, 2026

MASOMO YA MISA OKTOBA 28, 2026

JUMATANO, JUMA LA 30 LA MWAKA

SIKUKUU YA WATAKATIFU SIMONI NA YUDA, MITUME

SOMO 1

Efe. 2:19-22

Tangu sasa ninyi si wageni wala wapitaji, bali ninyi ni wenyeji pamoja na watakatifu, watu wa nyumbani mwake Mungu. Mmejengwa juu ya msingi wa mitume na manabii, naye Kristo Yesu mwenyewe ni jiwe kuu la pembeni. Katika yeye jengo lote linaungamanishwa vema na kuku ahata liwe hekalu takatifu katika Bwana. Katika yeye ninyi nanyi mnajengwa pamoja kuwa maskani ya Mungu katika Roho.

Neno la Bwana… Tumshukuru Mungu.

WIMBO WA KATIKATI

Zab. 19:1-4 (K) 4

(K) Sauti yao imeenea duniani mwote.

Mbingu zauhubiri utukufu wa Mungu,

Na anga laitangaza kazi ya mikono yake.

Mchana husemezana na mchana,

Usiku hutolea usiku maarifa. (K)

Hakuna lugha wala maneno,

Sauti yao haisikilikani.

Sauti yao imeenea duniani mwote,

Na maneno yao hata miisho ya ulimwengu.

Katika hizo ameliwekea jua hema. (K)

SHANGILIO

Aleluya, aleluya,

Ee Mungu, tunakusifu, tunakukiri kuwa Bwana. Jamii tukufu ya Mitume inakusifu.

Aleluya.

INJILI

Lk. 6:12-16

Yesu aliondoka akaenda mlimani ili kuomba, akakesha usiku kucha katika kumwomba Mungu. Hata kulipokuwa mchana aliwaita wanafunzi wake; akachagua kumi na wawili miongoni mwao, ambao aliwaita Mitume; Simoni, aliyemwita jina la pili Petro, na Andrea nduguye, na Yakobo na Yohane, na Filipo na Bartolomayo, na Mathayo na Tomaso, na Yakobo wa Alfayo, na Simoni aitwaye Zelote, na Yuda wa Yakobo, na Yuda Iskariote, ndiye aliyekuwa msaliti.

Neno la Bwana… Sifa kwako Ee Kristo.

Copyright © 1993 T.M.P. Book Department, Tabora - Tanzania: see MASOMO YA MISA. Scripture readings from ‘Biblia Takatifu’are published and copyright © 1975, 1993 by T.M.P. Book Department, Tabora – Tanzania.© Bible Society of Kenya, © Bible Society of Tanzania.These readings are a reproduction by Furaha ya Kikatoliki: see www.fur-kat.blogspot.com.

UFALME WA MUNGU-UPO NA BADO UTAKAMILIKA

“ASALI ITOKAYO MWAMBANI”

Jumanne, Oktoba 27, 2026

Juma la 30 la Mwaka wa Kanisa

Ef 5: 21-33;

Zab 128: 1-5;

Lk 13: 18-21

UFALME WA MUNGU-UPO NA BADO UTAKAMILIKA

Katika somo la kwanza Mtume Paulo anaendelea na maelekezo yake kwa Waefeso jinsi ya kuenenda kama wafuasi wa Kristo na leo anaingia katika ngazi ya familia. Anawaambia wake wawatii waume zao na waume wawapende wake zao. Ni katika kuendeleza tunu hizi katika familia ndipo twaweza kusema kuwa tunajenga ufalme wa Mungu katika familia zetu. Tunapoishi vizuri na wenzetu kwa upendo na kwa fadhili za Kimungu kama alivyotufundisha Kristo tunakuwa tunaishi Ufalme wa Mungu tungali hapa duniani. Ni katika kuuishi vizuri ufalme huo hapa duniani inatupa kibali cha utimilifu wake katika maisha yajayo. Yesu anatoa mifano miwili katika akilielezea Ufalme huu wa Mungu.

Ni ufalme ghani unao hubiriwa na Yesu? Mfano wa punji ya haradali na chachu unaelezea sifa za muhimu za Ufalme wa Mungu alio hubiri Yesu: udogo wake, tabia yake yakutokuonekana kirahisi; kazi yake na uwepo wake.

Yesu leo anafananisha ufalme wa Mungu na punji ya haradali na chachu. Puche ya haradali ni ndogo tena sana. Inapopandwa ardhini inakuwa na kuwa mti mkubwa ambapo ndege wa angani hupata makao. Lakini, pamoja na kwamba ni ndogo, na haijulikani na kujificha inapokuwa ardhini haibaki hapo tu bali huchipua na kumea. Chachu kidogo sana, ambayo huwezi kuiona kwa macho baada ya kuwekwa katika unga, haibaki kama ilivyo bali huumua unga wote.

Tabia ya Uwepo wake na utimilifu wake ujao wa Ufalme wa Mungu unaweza kuwa wetu tu kama matunda ya kazi ya Roho Mtakatifu.

Sala: Bwana, tunaomba ufungue macho yetu tuweze kutambua maajabu ya Ufalme wako, uliojificha na uwepo wake katika mambo madogo. Amina.

MASOMO YA MISA, OKTOBA 27, 2026

MASOMO YA MISA, OKTOBA 27, 2026

JUMANNE, JUMA LA 30 LA MWAKA WA KANISA

SOMO 1

Efe. 5:21 – 33

Hali mnanyenyekeana katika kicho cha Kristo. Enyi wake, watiini waume zenu kama kumtii Bwana wetu. Kwa maana mume ni kichwa cha mkewe, kama Kristo naye ni kichwa cha Kanisa; naye ni mwokozi wa mwili. Lakini kama vile Kanisa limtiivyo Kristo, vivyo hivyo wake nao wawatii waume zao katika kila jambo.

Enyi waume, wapendeni wake zenu, kama Kristo naye alivyolipenda Kanisa, akajitoa kwa ajili yake; ili makusudi alitakase na kulisafisha kwa maji katika neno; apate kujiletea Kanisa atukufu, lisilo na ila wala kunyanzi wal alolote kama hayo; bali liwe takatifu lisilo na mawaa. Vivyo hivyo imewapasa waume nao kuwapenda wake zao kama miili yao wenyewe. Ampendaye mkewe hujipenda wenyewe. Maana hakuna mtu anayeuchukia mwili wake popote; bali huulisha na kuutunza, kama Kristo naye navyolitendea Kanisa. Kwa kuwa tu viungo vya mwili wake. Kwa sababu hiyo mtu atamwacha baba yake na mama yake, ataambatana na mkewe na hao wawili watakuwa mwili mmoja.

Siri hiyo ni kubwa; ila mimi nanena habari ya Kristo na Kanisa. Lakini kila mtu ampende mke wake kama nafsi yake mwenyewe; wala mke asikose kumstahi mumewe.

Neno la Bwana… Tumshukuru Mungu.

WIMBO WA KATIKATI

Zab. 128:1 – 5 (K)

(K) Heri kila mtu amchaye Bwana.

Heri kila mtu amchaye Bwana,

Aendaye katika njia yake.

Taabu ya mikono yako hakika utaila;

Utakuwa heri, na kwako kwema. (K)

Mkeo atakuwa kama mzabibu uzaao,

Vyumbani mwa nyumba yako.

Wanao kama miche ya mizeituni

Wakiizunguka meza yako. (K)

Tazama, atabarikiwa hivyo, yule amchaye Bwana.

Bwana akubariki toka Sayuni;

Uone uheri wa Yerusalemu siku zote za maisha yako. (K)

SHANGILIO

1Pet. 1:25

Aleluya, aleluya,

Neno la Bwana hudumu hata milele, na neno hilo ni neno lile jema lililohubiriwa kwenu.

Aleluya.

INJILI

Lk. 13:18-21

Yesu alisema, Ufalme wa Mungu umefanana na nini? Nami niufananishe na nini? Umefanana na punji ya haradali aliyotwaa mtu akaitupa katika shamba lake; ikamea, ikawa mti; ndege wa angani wakakaa katika matawi yake.

Akasema mara ya pili, Niufananishe na nini ufalme wa Mungu? Umefanana na chachu aliyotwaa mwanamke akaisitiri ndani ya pichi tatu za unga, hata ukachacha wote pia.

Neno la Bwana… Sifa kwako Ee Kristo.

HURUMA YA MUNGU!

“ASALI ITOKAYO MWAMBANI”

Jumatatu, Oktoba 26, 2026

Juma la 30 la Mwaka wa Kanisa

Ef 4:32 – 5:8;

Zab 1:1-4, 6;

Lk 13:10-17

HURUMA YA MUNGU!

Katika Injili ya Leo Yesu anamponya Mwanamke mmoja mgonjwa aliyekuwa na pepo kwa muda wa miaka kumi nane. Lakini cha kushangaza viongozi wa Sinagogi hawakufurahi, kwasababu wao walijishughulisha na Sabato na si yule Mwanamke aliyekuwa mgonjwa akiteseka. Ndio maana Yesu anawaita “Wanafiki” kwasababu walishindwa kutoa mahitaji ya watu, na badala yake kuwafundisha watu woga na kujenga watu wasiwasi mioyoni mwao kuhusu Mungu. Walishindwa kuonesha upendo na kufundisha huruma na msamaha wa Mungu Baba na mara nyingi walielekea kwenye adhabu, na kushika sheria kwa nguvu.

Katika hali hiyo hiyo, Paulo anawaambia Waefeso wawe wakarimu, na wenye huruma moyoni na msamaha kwa wengine kwasababu Mungu amewaonesha huruma yake kwa njia ya Mwanae Yesu Kristo. Anawaita wamuige Mungu kwa kumpenda Yesu Kristo kama njia pekee ya kumwendea Mungu, ni Yesu pekee aliyetupa akili kamili kuhusu Mungu. Hakuna aliyefahamu ufalme wa Mungu unafananaje, kabla ya Yesu kuja kutupa mifano mbali mbali. Leo Yesu anatualika leo tuwatembelee wagonjwa, wanaoteseka na kuwaonesha huruma ambayo Mungu ameionesha kwetu.

Sala: Bwana mpendwa, tusaidie tuweze kuhisi upendo wako na huruma yako ili tuweze kuwa mwanga wa kweli wa huruma na ukarimu wako kwa wanadamu wote.

MASOMO YA MISA, OKTOBA 26, 2026

MASOMO YA MISA, OKTOBA 26, 2026

JUMATATU, JUMA LA 30 LA MWAKA WA KANISA

SOMO 1

Efe. 4:32 – 5:8

Iweni wafadhili ninyi kwa ninyi, wenye huruma mkasameheane kama na Mungu katika Kristo alivyowasamehe ninyi.

Hivyo mfuateni Mungu, kama watoto wanaopendwa; mkaenende katika upendo, kama Kristo naye alivyowapenda ninyi; tena akajitoa kwa ajili yetu, sadaka na dhabihu kwa Mungu, kuwa harufu ya manukato. Lakini uasherati usitajwe kwenu kamwe, wala uchafu wowote wala kutamani, kama iwastahilivyo watakatifu; wala aibu wala maneno ya upuzi wala ubishi; hayo hayapendezi; bali afadhali kushukuru. Maana neno hili mnalijua hakika, ya kwamba hakuna mwasherati wala mchafu wala mwenye tamaa, ndiye mwabudu sanamu, aliye na urithi katika ufalme wa Kristo na Mungu.

Mtu asiwadanganye kwa maneno yasiyo na maana; kwa kuwa kwa sababu ya hayo hasira ya Mungu huwajia wana wa uasi. Basi msishirikiane nao. Kwa maana zamani ninyi mlikuwa giza, bali sasa mmekuwa nuru katika Bwana; enendeni kama watoto wa nuru.

Neno la Bwana… Tumshukuru Mungu.

WIMBO WA KATIKATI

Zab. 68:1, 3, 5 – 6, 19 – 20 (K)

(K) Mfuateni Mungu, kama watoto wanaopendwa.

Heri mtu yule asiyekwenda

Katika shauri la wasio haki; wala hakusimama katika njia ya wakosaji;

Wala hakuketi barazani pa wenye mizaha.

Bali sheria ya Bwana ndiyo impendezayo,

Na sheria yake huitafakari mchana na usiku. (K)

Naye atakuwa kama mti uliopandwa

Kandokando ya vijito vya maji,

Uzaao matunda yake kwa majira yake,

Wala jani lake halinyauki;

Na kila alitendalo litafanikiwa. (K)

Sivyo walivyo wasio haki;

Hao ni kama makapi yapeperushwayo na upepo,

Kwa kuwa Bwana anaijua njia ya wenye haki.

Bali njia ya wasio haki itapotea. (K)

SHANGILIO

Yak. 1:18

Aleluya, aleluya,

Kwa kupenda kwake mwenyewe, Baba alituzaa sisi kwa neno la kweli, tuwe kama limbuko la viumbe vyake.

Aleluya.

INJILI

Lk. 13:10-17

Siku ya sabato Yesu alikuwa akifundisha katika sinagogi mojawapo. Na tazama, palikuwa na mwanamke aliyekuwa na pepo wa udhaifu muda wa miaka kumi na minane, naye amepindana, hawezi kujinyosha kabisa. Yesu alipomwona alimwita, akamwambia, Mama, umefunguliwa katika udhaifu wako. Akaweka mikono yake juu yake, naye akanyoka mara hiyo, akamtukuza Mungu.

Basi mkuu wa sinagogi alikasirika kwa sababu Yesu amemponya mtu siku ya sabato, akajibu akawaambia mkutano, Kuna siku sita zifaazo kufanya kazi, basi njoni mponywe katika siku hizo, wala si katika siku ya sabato. Lakini Bwana akamjibu akasema, Enyi wanafiki, kila mmoja wenu, Je! Hamfungi ng’ombe wake au punda wake siku ya sabato katika zizi, aende naye kumnywesha? Na huyu mwanamke, aliye wa uzao wa Ibrahimu, ambaye Shetani amemfunga miaka kumi na minane hii, haikupasa afunguliwe kifungo hiki siku ya sabato? Aliposema haya wakatahayari wote walioshindana naye; mkutano wote wakafurahi kwa sababu ya mambo matukufu yaliyotendwa na yeye.

Neno la Bwana… Sifa kwako Ee Kristo.

UPENDO:ALAMA YA UFUASI WA KIKRISTO!

“ASALI ITOKAYO MWAMBANI”

Tafakari ya kila siku

Jumapili, Oktoba 25, 2026

Juma la 30 la Mwaka

Sikukuu ya Watakatifu Simon na Yuda, Mitume

Kut 22:20-26;
Zab 17:2-4, 47, 51;
1Thes 1:5-10;
Mt 22:34-40

UPENDO:ALAMA YA UFUASI WA KIKRISTO!

Masomo ya leo yanatualika tutafakari juu ya msingi wa maisha ya kila mfuasi wa Kristo yalipojengwa: upendo kwa Mungu na jirani. Wakati mwingine tunapotezwa katika mawazo mabaya kuhusu upendo kwa Mungu na kwa jirani. Ni vizuri kutafakari juu ya hili mara kwa mara. Mwalimu wa Sheria alimuuliza Yesu swali ili kumtega. “ni Amri ipi iliyo kuu zaidi katika sheria?’ Ni wazi uhusiano wa Yesu na hawa viongozi wa dini unaonekana ulikuwa una malumbano. Walikuwa wakimjaribu hata kumtega. Lakini kama kawaida Yesu aliendelea kuwanyamazisha kwa maneno yake ya hekima.

Yesu alimjibu mwalimu wa sheria kwamba “umpende Bwana Mungu wako kwa moyo wako wote kwa akili zako zote… “hii ni amri kubwa kuliko zote na ya pili, “mpende jirani yako kama nafsi yako” (Mt 22:37-39). Yesu anatoa ufupisho wa sheria zote za maadili zinazo patikana katika Amri kumi za Mungu. Amri tatu za mwanzo, zinasisitiza upendo kwa Mungu kwa moyo wote. Na amri nyingine zinasisitiza upendo kwa jirani. Sheria ya maadili ya Mungu ni rahisi kama hizi amri mbili tu zinavyosema.

Mfuasi wa Kristo anapaswa kufuata sheria ya upendo. Sheria hii ina nyanja mbili –upendo kwa Mungu na upendo kwa jirani, na hii inakuwa ni alama ya ufuasi wetu. Nini maana ya kumpenda Mungu na jirani? Kwanza kabisa upendo wa Mungu ni kuuelewa upendo wa Mungu kwetu sisi. Sisi ni dhaifu kabisa na hatuwezi kumpenda Mungu kama inavyopaswa. Lakini kwa njia ya Kristo tunaweza kufahamu kwamba Mungu anatupenda. Hivyo kufahamu upendo wa Mungu licha ya kwamba mtu ni dhaifu inamfanya mtu ampende Mungu kama shukrani. Na huu ndio mwanzo wa upendo. Wakati mtoto mdogo anavyofahamu upendo wa mama juu yake, hauleti chochote kwa Mama. Huu ndio upendo wetu kwa Mungu. Wakati tunavyo ufahamu upendo wa Mungu sisi hatuongezi chochote kwa Mungu, hatuta anguka kwenye dhambi tutafana na yale yanayo mpendeza yeye. Inamfurahisha Mungu tunavyo pendana sisi kwa sisi. Mmoja akianza kumpenda Mungu, anaanza pia kuwapenda wengine.

Somo la kwanza leo kutoka katika kitabu cha kutoka linaelezea amri ya Mungu kwa wana wa Israeli: upendo kwa jirani. Ni wakati gani upendo wangu kwa jirani utakuwa mkamilifu? Tunapo wapenda majirani zetu tunatamani na wao wapate nafasi katika ufalme wa Mungu. Tunakuwa tunatamani kama wataishi katika neema ya Mungu siku zote za maisha yao. Na hivyo waweze kuishi milele kwa sababu ya neema tuliopokea kutoka kwa Kristo. Tukiwapenda wenzetu namna hii hatuwezi kuwanyima chochote au mahitaji yeyote wanayo taka kwetu. Tunakumbuka alichosema Yesu, kwamba mlicho watendea wadogo hawa mlinitendea mimi. Tunaenda kuwatembelea watu walio katika mahitaji mbali mbali kwa njia ambazo zipo katika uwezo wetu. Na huu ndio upendo kwa jirani.

Mt. Paulo katika barua yake kwa Wathesalonike katika somo la pili leo, anawakumbusha umuhimu wa kuongoka katika Imani ya maisha ya Kikristo, ambapo ni kumtumikia Mungu na kumtumikia Mwanae Yesu Kristo aliye mfunua Baba na Roho kwetu.

Tafakari juu ya wito wa kumpenda Mungu na jirani kwa jinsi ulivyo. Fikiria juu ya neno “wote” kupenda kwa moyo “wote”, na ukitafakari kuhusu hili utatambua njia ambazo umeshindwa kutoa kitu kwa ajili ya Mungu na hata kwa jirani. Ukiona upungufu wako, anza tena kwa kujikabidhi katika kuwa zawadi kwa Mungu na kwa jirani.

Sala: Bwana, ninachagua kukupenda wewe kwa Moyo wangu wote, akili na utashi wote na nguvu. Nipe neema niweze kuishi amri hizi mbili za upendo na kuziona kama njia za kuelekea kwenye utakatifu wa maisha. Ninakupenda Bwana wangu. Yesu nakuamini wewe. Amina

MASOMO YA MISA, OKTOBA 25, 2026

MASOMO YA MISA,
OKTOBA 25, 2026

DOMINIKA YA 30 YA MWAKA

MWANZO:

Zab. 105:3-4

Ufurahi moyo wao wamtafutao Bwana. Mtakeni Bwana na nguvu zake, utafuteni uso wake siku zote.

SOMO 1
Kut. 22:21-27

Usimwonee mgeni, wala kumtendea jeuri; kwa kuwa ninyi mlikuwa wageni katika nchi ya Misri. Usimtese mjane yoyote aliyefiwa na mumewe, wala mtoto yatima. Ukiwatesa watu hao katika neno lolote, nao wakanililia mimi, hakika yangu nitasikia kilio chao, na hasira yangu itawaka moto, nami nitawaua ninyi kwa upanga; na wake wenu watakuwa wajane, na watoto wenu mayatima. Ukimkopesha mtu aliye maskini, katika watu wangu walio pamoja nawe; usiwe kwake mfano wa mwenye kumdai; wala hutamwandikia faida. Ikiwa wewe kwa njia yoyote wapokea nguo ya jirani yako rehani, lazima utamrudishia mbele ya jua kuchwa; maana hiyo nguo ni kifuniko chake, hiyo peke yake ni nguo ya ngozi yake; je! Atalalia nini? Itakuwa, hapo atakaponililia mimi, nitasikia; kwa kuwa mimi ni mwenye rehema.

Neno la Bwana… Tumshukuru Mungu.

WIMBO WA KATIKATI
Zab. 18:1-3, 46, 50 (K) 1

(K) Wewe, Bwana, nguvu yangu, nakupenda sana.
Wewe Bwana, nguvu zangu, nakupenda sana;
Bwana ni jabali langu, na boma langu,
Na mwokozi wangu. (K)

Mungu wangu, mwamba wangu ninayemkimbilia,
Ngao yangu, na pembe ya wokovu wangu,
Na ngome yangu.
Nitamwita Bwana astahiliye kusifiwa,
Hivyo nitaokoka na adui zangu. (K)

Bwana ndiye aliye hai,
Na atukuzwe Mungu wa wokovu wangu.
Ampa mfalme wokovu mkuu.
Amfanyia fadhili masihi wake. (K)

SOMO 2
1Thes. 1:5-10

Kama vile mnavyojua jinsi zilivyokuwa tabia zetu kwenu, kwa ajili yenu. Nanyi mkawa wafuasi wetu na wa Bwana, mkiisha kulipokea neno katika dhiki nyingi, pamoja na furaha ya Roho Mtakatifu. Hata mkawa kielelezo kwa watu wote waaminio katika Makedonia, na katika Akaya. Maana kutoka kwenu neno la Mungu limevuma, si katika Makedonia na Akaya tu, ila na kila mahali imani yenu mliyo nayo kwa Mungu imeenea; hata hatuna haja sisi kunena lolote. Kwa kuwa wao wenyewe wanatangaza habari zetu, jinsi kulivyokuwa kuingia kwetu kwenu; na jinsi mlivyomgeukia Mungu mkaziacha sanamu, ili kumtumikia Mungu aliye hai, wa kweli; na kumngojea Mwanae kutoka mbinguni, ambaye alimfufua katika wafu, naye ni Yesu, mwenye kutuokoa na ghadhabu itakayokuja.

Neno la Bwana… Tumshukuru Mungu.

SHANGILIO
Yn. 1:12, 14

Aleluya, aleluya,
Naye neno alifanyika mwili, akakaa kwetu; Wote waliompokea aliwapa uwezo wa kufanyika watoto wa Mungu.
Aleluya.

INJILI
Mt. 22:34-40

Mafarisayo waliposikia ya kwamba amewafumba kinywa wale Masadukayo, walifanya shauri pamoja. Mmoja wao, mwanasheria, akamwuliza, akimjaribu; Mwalimu, katika torati ni amri ipi iliyo kuu? Akamwambia, Mpende Bwana Mungu wako kwa moyo wako wote, na kwa roho yako yote, na kwa akili zako zote. Hii ndiyo amri iliyo kuu, tena ni ya kwanza. Na ya pili yafanana nayo, nayo ni hii, Mpende jirani yako kama nafsi yako. Katika amri hizi mbili hutegemea torati yote na manabii.

Neno la Bwana… Sifa kwako Ee Kristu.

________

THAMANI YA WAKATI WA SASA!

“ASALI ITOKAYO MWAMBANI”

Jumamosi, Oktoba, 24, 2026,

Juma la 29 la Mwaka wa Kanisa

Ef 4:7-16;

Zab 121:1-5;

Lk 13:1-9

THAMANI YA WAKATI WA SASA!

Majanga au ajali katika maisha ya watu mara nyingi zinawafanya wajiulize maswali kama vile, kwanini? Au kwanini wao? Katika Injili ya leo Yesu anaeleza juu ya tukio baya lililosababisha vifo vya baadhi ya Wagalilaya waliouwawa na jeshi la Warumi chini ya utawala wa Kamanda Pilato. Kipindi flani watu walisema kwamba hii ilikuwa adhabu ya Mungu kwa hawa watu kwasababu ya maadili yao mabaya. Yesu anakataa akisema mwadhani walikuwa ni wakosefu kuliko watu walioishi Yerusalemu? “Kwahakika hapana!” Alisema. Kwa uhakika anawaambia Wafuasi wake kwamba nao watakutana na mambo kama hayo wasipobadili mienendo yao. Dhambi za waliokufa haikuwa sababu ya kifo chao, bali ni onyo kwetu ili kuona kama tupo tayari kwa tukio kama hilo.

Yesu anaendelea akielezea maana ya hayo akitumia mfano wa Mtini. Katika taswira watu aliokuwa anaongea nao walikuwa kama mtini ambao haujazaa matunda. Miaka mitatu iliyotajwa katika mfano huu inaweza kulinganishwa na urefu wa miaka mitatu ya utume wa Yesu. Lakini, bado wana muda wakuchunguza maisha yao, muda ambao hawakupewa wale waliokufa katika matukio yale mawili. Sisi nasi tumepewa muda- siku? Mwezi? Miaka mingi? Hatuna habari juu ya hilo. Lililo wazi ni kwamba hamna muda wa kupoteza, tunaanza leo, na zaidi sana sasa hivi. Kwa Mungu, miaka iliyopita haijalishi wala si maisha ya baadaye, kinacho jalisha ni “sasa”. Kama nipo naye sasa katika maisha yangu, sina chochote cha kuhofia.

SALA: Bwana nisaidie niweze kutumia vizuri muda ulionipa, niweze kubadili maisha yangu. Amina.

MASOMO YA MISA OKTOBA 24, 2026

MASOMO YA MISA OKTOBA 24, 2026

JUMAMOSI, JUMA LA 29 LA MWAKA WA KANISA

SOMO 1

Efe. 4:7 – 16

Kila mmoja wetu alipewa neema kwa kadiri ya kipimo cha kipawa chake Kristo. Hivyo husema, Alipopaa juu aliteka mateka, Akawapa wanadamu vipawa.

Basi neno hilo, Aliopaa, maana yake nini kama siyo kusema kwamba yeye naye alishuka mpaka pande zilizo chini, za nchi? Naye aliyeshuka ndiye yeye aliyepaa; juu sana kupita mbingu zote, ili avijaze vitu vyote. Naye alitoa wengine kuwa mitume; na wengine kuwa manabii; na wengine kuwa wainjilisti; na wengine kuwa wachungaji na waalimu; kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; hata na sisi sote tutakapoufikia umoja wa Imani na kumfahamu sansa Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo.

Tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu. Lakini tuishike kweli katika upendo na kuku ahata tumfikie yeye katika yote, yeye aliye kichwa, Kristo. Katika yeye mwili wote ukiungamanishwa na kushikanishwa kwa msaada wa kila kiungo, kwa kadiri ya utendaji wa kila sehemu moja moja, huukuza mwili upate kujijenga wenyewe katika upendo.

Neno la Bwana… Tumshukuru Mungu.

WIMBO WA KATIKATI

Zab. 122:1 – 5 (K) 1

(K) Nalifurahi waliponiambia, na twende nyumbani kwa Bwana.

Nalifurahi waliponiambia,

Na twende nyumbani kwa Bwana.

Miguu yetu imesimama

Ndani ya malango yako, Ee Yerusalemu. (K)

Ee Yerusalmeu uliyejengwa

Kama mji ulioshikamana,

Huko ndiko waliopanda kabila,

Kabila za Bwana. (K)

Ushuhuda kwa Israeli,

Walishukuru jina la Bwana.

Maana huko viliwekwa viti vya hukumu,

Viti vya enzi vya mbari ya Daudi. (K)

SHANGILIO

2Tim. 1:10

Aleluya, aleluya,

Mwokozi wetu Yesu Kristo alibatili mauti, na kuufunua uzima na kutokuharibika kwa Injili.

Aleluya.

INJILI

Lk. 13:1-9

Wakati huo walikuwapo watu waliompasha Yesu habari ya Wagalilaya wale ambao Pilato alichanganya damu yao na dhabihu zao. Akawajibu akwaambia, Je! Mwadhani ya kwamba Wagalilaya hao walikuwa wenye dhambi kuliko Wagalilaya wote, hata wakapatwa na mambo hayo? Nawaambia, Sivyo; lakini msipotubu, ninyi nyote mtaangamia vivyo hivyo. Au wale kumi na wanane, walioangukiwa na mnara huko Siloamu, ukawaua mwadhani ya kwamba wao walikuwa wakosaji kuliko watu wote waliokaa Yerusalemu? Nawaambia, Sivyo; lakini msipotubu, ninyi nyote mtaangamia vivyo hivyo.

Akanena mfano huu; Mtu mmoja alikuwa na mtini umepandwa katika shamba lake la mizabibu; akaenda akitafua matunda juu yake, asipate. Akamwambia mtunzaji wa shamba la mizabibu, Tazama, miaka mitatu hii naja nikitafuta matunda juu ya mtini huu, nisipate kitu; uukate, mbona hata nchi unaiharibu? Akajibu akamwambia, Bwana, uuache mwaka huu nao, hata niupalilie, niutilie samadi; nao ukizaa matunda baadaye, vema! La, usipozaa, ndipo uukate.

Neno la Bwana… Sifa kwako Ee Kristo.

Everyday Saint / Maisha ya Watakatifu