WOTE WANAALIKWA KWENYE MEZA YA YESU!

 

“ASALI ITOKAYO MWAMBANI”

Desemba 11, 2020.

------------------------------------------------

 

 

IJUMAA, JUMA LA 2 LA MAJILIO

 

Somo la 1: Isa 48:17-19 Bwana anatuambia, kama tungefuata na kuonywa na amri zake, furaha yetu ingekuwa kama mto, uaminifu wetu kama mawimbi ya bahari.

 

Wimbo wa katikati: Zab 1:1-4, 6 Anayenikufuata wewe Ee Bwana, atakuwa na uzima wa milele. Atakuwa kama mti uliopandwa kando ya mto, unaozaa matunda yake kwa wakati.

 

Injili: Mt 11:16-19 Yesu analalamika kuhusu unafiki wa Mafarisayo na Waandishi. Si yeye wala Yohane ambaye ataweza kukata kiu ya watu ambao wana aina ya Masiha wao wanaompenda wao, mwenye kutimiza haja ya njia zao.

------------------------------------------------

 

WOTE WANAALIKWA KWENYE MEZA YA YESU!

Karibuni ndugu zangu kwa adhimisho la Misa Takatifu asubuhi ya leo. Leo neno la Bwana katika somo la kwanza Bwana Mungu anamueleza Yuda kwamba angalau kama angalifahamu faida iliyopo katika kushika sheria zake. Hakika angalijikuta mahali pa pekee zaidi, asingalikuwa katika shida hizo, angalikuwa mkuu kabisa.

 

Israeli alikuwa maskini kwa sababu alienda kuiga mataifa mengine, alikwenda kuiga ya dunia na kula huko mataputapu na mwisho wa siku akajikuta katika shida kubwa namna hii, ambapo hawezi kabisa kujiletea ukombozi.

 

Ndugu zangu kumcha Bwana kuna faida kubwa sana. Wengi wetu tupo katika hali mbaya kwa sababu tuliacha kumcha Bwana, tukaiga ya dunia, tukaiga watu maarufu, tukaiga wanamuziki, tukataka kuvaa wanavyovaa, wanavyoongea, wanavyoimba, wanavyooa na kuolewa, tukaiga mitindo yao ya maisha na kudharau maisha ya sala kama yaliyopitwa na wakati.

 

Sala ndugu zangu haijapitwa na wakati, huku kwenda na wakati ndiko kunakoturudisha nyuma. Mara nyingi tukishafanikiwa huwa tunamsahau Bwana, ni wakati tu wa shida ndio tunamrudia Bwana. Naamini kama wakati wa mafanikio tungaliendeleza kukaa na Bwana katika sala, tungalisalia kukua zaidi. Mara nyingi mafanikio yanatukosesha ukaribu na Mungu na hapa ndipo tunaanguka zaidi.

Tumwombe Mungu neema ya kumrudia hata kipindi cha mafanikio. Tuyatunze mafanikio yetu kwa njia ya sala.

 

Katika somo la injili Yesu anasononeshwa na vizazi hivi vya sasa kwa sababu havikosi majibu mabaya na kuwatungia wengine mabaya. Kilimuona Yohane kikamuona anapepo, Yesu anaitwa mlafi. Hiki ni kizazi chenye wivu, kisichotaka mtu anayewapa changamoto. Kinatafuta kumwangusha kila mtu ili basi wote waonekane wameoza ili asitokee wa kuwakaripia wanapofanya ubaya.

 

Tabia hii ikiendelezwa ulimwenguni huishia kuufanya urudi nyuma, na tunaishia kukosa watakatifu, tukitaka kila mtu awe mbaya. Sisi tukiona mtu anayejitokeza na kuishi vyema tumtie moyo, tusitake kila mmoja arudi nyuma afafane na sisi, awe na matope kama sisi ndio tuone ati ni vyema. Hapana, ukimuona anayejitahidi kuwa mtakatifu mpatie moyo. Usitafute mapungufu yake na kuyatangaza.

 

Ndivyo inavyofanywa na vyombo vya habari sasa vya ulaya. Yaani inaweza kufika mahali wanalitangaza kanisa vibaya ili lisionekane kama lina utakatifu wowote. Lionekane kama "NGO" tu. Tunakosa watakatifu kwa sababu ya kusemana vibaya. Wale wanaojitahidi tunawavuta chini. Sisi tuwatie wengine moyo wajitaidi zaidi na zaidi. Tumsifu Yesu Kristo.

 

------------------------

Copyright ©2013-2020 ©FurKat, FurahayaKikatoliki: see www.fur-kat.blogspot.com.