ALHAMISI OKTAVA YA NOELI

“ASALI ITOKAYO MWABANI”

Desemba 31, 2020.

------------------------------------------------

 

ALHAMISI OKTAVA YA NOELI

 

Ndugu zangu karibuni kwa adhimisho la Misa Takatifu asubuni ya leo. Fumbo la umwilisho linaloelezewa na injili ya leo la Neno aliye Mungu kutwaa ubinadamu lilileta ugumu katika kulielewa na kuliamini. Baadhi hawakulipokea bali walitunga maelezo tofauti kulielezea na hivyo palitokea manabii wa uongo. Baadhi yao walikuwa ni Wadoketi (Docetists) waliosisitiza kwamba Yesu alifanania kama binadamu tu lakini kwa undani, hakuwa binadamu. Wengine walikataa Umungu wa Yesu kabisa. Kuendana na 1 Yoh 4:1-3, hawa kwa ujumla hawakuamini Yesu Kristo kuwa mwana wa Mungu na kwamba alikuja kwa njia ya mwili. Ila kwa sababu Mtume Yohane aliishi kwa muda mrefu, ilimbidi apinge uzushi wa manabii hawa kama anavyofanya katika somo la kwanza.

 

Nyakati zetu pia zimezidi kwa manabii wa uongo. Wengine wanamuona Yesu kuwa kama ATM, wengine kama mtoa raha tu, wengine hawamkubali kama Mungu. Huu ni mwaliko kwetu kwamba lazima tukatae aina hizi za upotoshaji na kumhubiri Kristo sawasawa.

 

Yohane katika somo la kwanza anaendelea kuzungumzia juu ya ujio wa manabii wa uongo. Anasema kwamba mwanzoni walikuwa wakristo miongoni mwa jamii ya waamini lakini wakaamua kwenda kivyao. Nabii wa uongo ni wa kuogopwa kwani hupotosha jamii yote ya waamini kirahisi kwani ni kama mbwa mwitu aliyevaa ngozi ya kondoo. Siku hizi wengi wamekwishapotoshwa na manabii hawa.

 

Sisi basi habari hizi tumezisikia lakini ni huzuni sana kwani manabii wa uongo wamekuwa wakiibuka kila siku na wamekuwa wakipata wafuasi kila kukicha. Sisi tuombe kuwatambua manabii hawa wa uongo na kuwapinga. Tuepuke pia kishawishi cha kujitenga na jamii ya waamini. Hiki ni chanzo kikuu cha manabii wa uongo. Ndani ya kanisa tutashinda, nje ya kanisa hatuwezi chochote.

 

 

Copyright ©2013-2020 ©FurKat, FurahayaKikatoliki: see www.fur-kat.blogspot.com.