MASOMO YA MISA, MEI 27, 2024

MASOMO YA MISA, MEI 27, 2024

JUMATATU, JUMA LA 8 LA MWAKA

SOMO 1 

1 Pet. 1:3-9

Ahimidiwe Mungu, Baba wa Bwana wetu Yesu Kristo, ambaye kwa rehema zake nyingi alituzaa mara ya pili ili tupate tumaini lenye uzima kwa kufufuka kwake Yesu Kristo katika wafu; tupate na urithi usioharibika, usio na uchafu, usionyauka. uliotunzwa mbinguni kwa ajili yenu. Nanyi mnalindwa na nguvu za Mungu kwa njia ya imani hata mpate wokovu ulio tayari kufunuliwa wakati wa mwisho. Mnafurahi sana wakati huo, ijapokuwa sasa kwa kitambo kidogo, ikiwa ni lazima, mmehuzunishwa kwa majaribu ya namna mbalimbali; ili kwamba kujaribiwa kwa imani yenu, ambayo ina thamani kuu kuliko dhahabu ipoteayo, ijapokuwa hiyo hujaribiwa kwa moto, kuonekane kuwa kwenye sifa na utukufu na heshima, katika kufunuliwa kwake Yesu Kristo. Naye mwampenda, ijapokuwa hamkumwona; ambaye ijapokuwa hamwoni sasa. mnamwamini; na kufurahi sana, kwa furaha isiyoneneka, yenye utukufu, katika kuupokea mwisho wa imani yenu, vaani, wokovu wa roho zenu.

Neno la Bwana... Tumshukuru Mungu.

WIMBO WA KATIKATI 

Zab. 111 :1-2, 5-6, 9-10 (K) 5

(K) Atalikumbuka agano lake milele. au: Aleluya.

Aleluya,

Nitamshukuru Bwana kwa moyo wangu wote, 

Barazani pa wanyofu wa moyo na katika mkutano. 

Matendo ya Bwana ni makuu,

Yafikiriwa sana na wapendezwao nayo. (K)

Amewapa wamchao chakula;

Atalikumbuka agano lake milele.

Amewajulisha watu wake uwezo wa matendo yake. 

Kwa kuwapa urithi wa mataifa. (K)

Amewapelekea watu wake ukombozi.

Ameamuru agano lake liwe la milele,

Jina lake ni takatifu la kuogopwa. (K)

Kumcha Bwana ndio mwanzo wa hekima,

Wote wafanyao hayo wana akili njema,

Sifa zake zakaa milele. (K)

SHANGILIO 

Mt. 4 : 4

Aleluya, aleluya, 

Mtu hataishi kwa mkate tu, ila kwa kila neno litokalo katika kinywa cha Mungu. Aleluya.

INJILI

Mk. 10:17-27

Yesu alipokuwa akitoka kwenda njiani, mtu mmoja akaja mbio, akampigia magoti, akamwuliza, Mwalimu mwema, nifanye nini nipate kuurithi uzima wa milele? Yesu akamwambia, Kwa nini kuniita mwema? Hakuna aliye mwema ila mmoja, ndiye Mungu. Wazijua amri, Usiue, Usizini, Usiibe, Usishuhudie uongo, Usidanganye, Waheshimu baba yako na mama yako. Akamwambia, Mwalimu, haya yote nimeyashika tangu utoto wangu. Yesu akamkazia macho, akampenda, akamwambia, Umepungukiwa na neno moja, Enenda ukauze ulivyo navyo vyote. Uwape maskini, nawe utakuwa na hazina mbinguni; kisha njoo unifuate. Walakini yeye akakunja uso kwa neno hilo, akaenda zake kwa huzuni; kwa sababu alikuwa na mali nyingi.

Yesu akatazama kotekote, akawaambia wanafunzi wake, Jinsi itakavyokuwa shida wenye mali kuingia katika ufalme wa Mungu! Wanafunzi wakashangaa kwa maneno yake. Yesu akajibu tena, akawaambia, Watoto, jinsi ilivyo shida wenye kutegemea mali kuingia katika ufalme wa Mungu! Ni rahisi ngamia kupenya katika tundu la sindano kuliko tajiri kuingia katika ufalme wa Mungu, Nao wakashangaa mno, wakimwambia, Ni nani, basi, awezaye kuokoka? Yesu akawakazia macho, akasema, Kwa wanadamu haiwezekani, bali kwa Mungu sivyo; maanayoteyawezekana kwa Mungu.

Neno la Bwana... Sifa kwako Ee Kristo. 

Copyright © 2024, "MASOMO YA MISA" published by T.M.P. Book Department, Tabora – Tanzania. Readings reproduced by Furaha ya Kikatoliki: see www.fur-kat.blogspot.com.