MASOMO YA MISA, MEI 25, 2024

MASOMO YA MISA, MEI 25, 2024

JUMAMOSI, JUMA LA 7 LA MWAKA

SOMO 1

Yak. 5:13 – 20

Mtu wa kwenu amepatika na mabaya? Na aombe. Ana moyo wa kuchangamka? Na aimbe zaburi. Mtu wa kwenu amekuwa hawezi? Na waite wazee wa kanisa; nao wamwombee, na kumpaka mafuta kwa jina la Bwana. Na kule kuomba kwa Imani kutamwokoa mgonjwa yule, na Bwana atamwinua; hata ikiwa amefanya dhambi, atasamehewa. Ungameni dhambi zenu ninyi kwa ninyi, na kuombeana, mpatate kuponywa. Kuomba kwake mwenye haki kwafaa sana, akiomba kwa bidii. Eliya alikuwa mwanadamu mwenye tabia moja na sisi akaomba kwa bidii mvua isinye; na mvua haikunya juu ya nchi muda wa miaka mitatu na miezi sita. Akaomba tena, mbingu zikatoa mvua, nayo nchi ikazaa matunda yake. Ndugu zangu, ikiwa mtu wa kwenu amepotea mbali na kweli, na mtu mwingine akamrejeza; jueni ya kuwa yeye amrejezaye mwenye dhambi hata atoke katika njia ya upotevu, ataokoa roho na mauti, na kufunika wingi wa dhambi.

Neno la Mungu… Tumshukuru Mungu.

WIMBO WA KATIKATI

Zab. 141: 1 – 3, 8

(K) Sala yangu ipae mbele zako kama uvumba.

Ee Bwana, nimekuita, unijie hima,

Uisikie sauti yangu nikuitapo.

Sala yangu ipae mbele zako kama uvumba,

Kuinuliwa mikono yangu kama dhabihu ya jioni. (K)

Ee Bwana, uweke mlinzi kinywani pangu,

Mngojezi mlangoni pa midomo yangu.

Macho yangu yanakuelekea Wewe, Mungu Bwana,

Nimekukimbilia Wewe, usiniache nafsi yangu. (K) 

SHANGILIO

Yn. 17:17

Aleluya, aleluya.

Neno lako ndiyo kweli, ee Bwana, ututakase kwa ile kweli.

Aleluya.

INJILI

Mk. 10:13 – 16

Makutano walimletea Yesu watoto wadogo ili awaguse; wanafunzi wake wakawakemea. Ila Yesu alipoona alichukuzwa sana, akawaambia, Waacheni watoto wadogo waje kwangu, msiwazuie; kwa maana watoto kama hawa ufalme wa Mungu ni wao. Amin, nawaambieni, Yeyote asiyeukubali ufalme wa Mungu kama mtoto mdogo hatauingia kabisa. Akawakumbatia, akaweka mikono yake juu yao, akawabariki.

Neno la Bwana… Sifa kwako Ee Kristo. 

Copyright © 2024, "MASOMO YA MISA" published by T.M.P. Book Department, Tabora – Tanzania. Readings reproduced by Furaha ya Kikatoliki: see www.fur-kat.blogspot.com.