ROZARI: TAFAKARI NA SALA ILIOJIKITA KATIKA KRISTO !

 “ASALI ITOKAYO MWAMBANI”

Jumanne, Oktoba 7, 2025

Juma la 27 la Mwaka wa Kanisa

Kumbukumbu ya Bikira Maria wa Rozari

Yon 3: 1-10

Zab 130: 1-4, 7-8 (K) 3;

Lk 10: 38-42.

ROZARI: TAFAKARI NA SALA ILIOJIKITA KATIKA KRISTO !

Wengi wetu tunasali rozari wenyewe, katika jumuiya au katika familia lakini huenda mara nyingi hatujui maana yake na umuhimu wake. Mt. Papa Yohane Paulo wa pili katika barua yake ya Kitume “Rozari ya Bikira Maria” anasema “Rozari, ingawaje ina tabia ya Maria, katika moyo wake ni sala iliojikita katika Kristo. Ina kina cha ujumbe wa Injili katika hali yake yote. Ina sauti ya Maria, wimbo wake wa daima kwa kazi ya ukombozi-umwilisho ilioanza ndani ya tumbo lake…..”. Kielelezo cha Rosari ni juu ya Yesu-kuzaliwa kwake, maisha yake, kifo na ufufuko. Sala ya ‘Baba Yetu’ inatukumbusha kwamba Baba yake Yesu ndiye chanzo cha Ukombozi. ‘Salamu Maria’ inatusaidia kuungana na Maria kutafakari mafumbo hayo. Inatusaidia kutambua pia Maria alikuwepo na ameunganika na Mwanae katika mafumbo yote duniani na uwepo wake Mbinguni. ‘Atukuzwe Baba’  inatukumbusha kwamba umuhimu wa maisha yote ni kwa ajili ya utukufu wa Utatu Mtakatifu. Hivyo, Rozari inatusaidia kutafakari juu ya umuhimu wa mafumbo ya wokovu wetu.

Rosari inapaswa ituguse sisi. Ni rahisi. Kurudia kwa maneno kila mara inatusaidia kujenga hali ambayo tutatafakari mafumbo ya Mungu. Tutambue kuwa, Yesu na Maria wapo nasi katika furaha na uchungu katika maisha yetu. Tumuombe Bikira Maria atuombee tuweze kujenga tabia ya ndani ya kusali rosari kila siku. Hii ni nyenzo ya sala zetu zote: tufikie mahali ambapo “tutasali bila kuchoka” kama Mtakatifu Paulo alivyosema.

Leo tutasikia nabii Yona ambaye anawahubiria watu wa Ninawi juu ya kuangamizwa kwao kwasababu ya dhambi zao. Lakini pia tunasikia juu ya Mungu, kama Mungu kweli alikuwa ameamua kweli kuwaangamiza si asinge mwambia Yona aende? Ukweli unaweza kuona kwamba Mungu ana huruma kweli kweli, alipenda watubu wapate kuishi! Lakini pia Yona kukataa kwake kuongea kwa niaba ya Mungu pengine Mungu angemuangamiza lakini bado alimuonesha huruma. Mungu ni mwingi wa huruma si mwepesi wa hasira. Bwana kama ungehesabu maovu yetu, nani angesimama? (Zab 130:1). Watu wa Ninawi walifanya uamuzi sahihi kwa kubadili njia zao. Mungu aliona juhudi zao akawakomboa.

Wakati Yesu alivyo watembelea Martha na Maria, Martha alikuwa akijishughulisha jikoni na pale Maria anakaa karibu na miguu ya Yesu huku akimsikiliza akiongea. Martha anamuomba Yesu amwambie Maria amsaidie. Yesu anamwambia Martha ana hofu na mambo mengi, wakati Maria amechagua njia sahihi zaidi. Tunaweza kushangaa kwani Martha hakuwa anafanya jambo lilo sahihi ambalo angepaswa kufanya?

Katika maisha yetu ya kila siku pia, mara nyingi tunafanya kazi tena na tena na wakati mwingine tunasahau kwanini kumekuwa na muda maalumu wa kazi. Watu wa ndoa wake kwa waume, wanapoteza muda mwingi katika kazi, na kuwa na muda kidogo tena sana wakuwa pamoja wao kwa wao na pia kuwa na watoto wao. Mapadre na wale wa maisha ya wakfu, hujikuta wanakuwa na muda mwingi wa kufanya utume na kazi nyingi na hata kuwa na muda mchache wakuwa pamoja na kwasababu ya kuchoka huenda kuacha kusali. Na hii huaribu maisha ya jumuiya kwasababu muda wa kupanga mambo pamoja hukosekana.

Sala: Ee Bikira Maria, niombee ili kusali rozari kila siku iwe tabia yangu, katika harakati ya shughuli zangu mbali mbali, muunganiko wa umoja katika matendo yangu, tabia ya muunganiko mtakatifu, kiburudisho kamili, hali ya kutia moyo ili kutembea kwa furaha katika njia ya majukumu yangu. Amina

Copyright ©2013-2025 ©FurKat, Furaha ya Kikatoliki: see www.fur-kat.blogspot.com