MASOMO YA MISA JUMANNE, SEPTEMBA 24, 2024

MASOMO YA MISA 

JUMANNE, SEPTEMBA 24, 2024

JUMA LA 25 LA MWAKA

SOMO 1

Mit. 21:1 – 6, 10 – 13

Moyo wa mfalme huwa katika mkono wa Bwana; kama mfereji wa maji huugeuza popote apendapo. Kila njia ya mtu ni sawa machoni pake mwenyewe; bali Bwana huipima mioyo. Kutenda haki na hukumu humpendeza Bwana kuliko kutoa sadaka. Macho yenye kiburi, na moyo wa kutakabari, hata ukulima wa waovu, ni dhambi. Mawazo ya wenye bidii huuelekea utajiri tu; bali kila mwenye pupa huuelekea uhitaji. Kupata akiba ya mali kwa ulimi wa uongo ni moshi upeperushwao; ni kutafuta mauti. Nafsi ya mtu mbaya hutamani maovu; jirani yake hapati fadhili machoni pake. Mwenye mzaha aadhibiwapo, mjinga hupata hekima; na mwenye hekima afundishwapo, hupokea maarifa. Mwenye haki huitafakari nyumba ya mtu mbaya; jinsi wabaya waangushwavyo wakaangamia. Azibaye masikio yake asisikie kilio cha maskini, yeye naye atalia, lakini hatasikiwa.

Neno la Bwana… Tumshukuru Mungu.

WIMBO WA KATIKATI

Zab. 119:1, 27, 30, 34 – 35, 44 (K) 35

(K) Uniendeshe katika mapito ya maagizo yako, Ee Bwana.

Heri walio kamili njia zao,

Waendao katika sheria ya Bwana.

Unifahamishe njia ya mausia yako,

Nami nitayatafakari maajabu yako. (K)

Nimeichagua njia ya uaminifu,

Na kuziweka hukumu zako mbele yangu.

Unifahamishe nami nitaishika sheria yako,

Naam, nitaitii kwa moyo wangu wote. (K)

Uniendeshe katika mapito ya maagizo yako,

Kwa maana nimependezwa nayo.

Nami nitaitii sheria yako daima,

Naam, milele na milele. (K)

SHANGILIO

1Pet. 1:25

Aleluya, aleluya,

Neno la Bwana hudumu hata milele, na neno hilo ni neno lile jema lililohubiriwa kwenu.

Aleluya.

INJILI

Lk. 8:19 – 21

Walimwendea Yesu mama yake na ndugu zake, wasiweze kumkaribia kwa sababu ya mkutano. Akaletewa habari akiambiwa, Mama yako na ndugu zako wamesimama nje wakitaka kuonana nawe. Akawajibu akasema, Mama yangu na ndugu zangu ndio hao walisikiao neno la Mungu na kulifanya.

Neno la Bwana… Sifa kwako Ee Kristo.

Copyright © 1993 T.M.P. Book Department, Tabora - Tanzania: see MASOMO YA MISA. Scripture readings from ‘Biblia Takatifu’are published and copyright © 1975, 1993 by T.M.P. Book Department, Tabora – Tanzania.© Bible Society of Kenya, © Bible Society of Tanzania.These readings are a reproduction by Furaha ya Kikatoliki: see www.fur-kat.blogspot.com.