MASOMO YA MISA, MEI 21, 2024

MASOMO YA MISA, MEI 21, 2024

JUMANNE, JUMA LA 7 LA MWAKA

SOMO 1

Yak. 4: 1 – 10

Vita vyatoka wapi, na mapigano yaliyoko kati yenu yatoka wapi? Si humu, katika tamaa zenu zifanyazo vita katika viungo vyenu? Mwatamani, wala hamna kitu; mwaua na kuona wivu, wala hamwezi kupata. Mwafanya vita na kupigana, wala hamna kitu kwa kuwa hamwombi! Hata mwaomba, wala hampati kwa sababu mwaomba vibaya, ili mvitumie kwa tamaa zenu.

Enyi wazinzi, hamjui ya kwamba kuwa rafiki wa dunia ni kuwa adui wa Mungu? Basi kila atakaye kuwa rafiki wa dunia hujifanya kuwa adui wa Mungu. Au mwadhani ya kwamba maandiko yasema bure? Huyo Roho akaaye ndani yenu hututamani kiasi cha kuona wivu? Lakini hutujalia sisi neema iliyozidi; kwa hiyo husema Mungu huwapinga wajikuzao, bali huwapa neema wanyenyekevu.

Basi mtiini Mungu. Mpingeni Shetani, naye atawakimbia. Mkaribieni Mungu, naye atawakaribia ninyi. Itakaseni mikono yenu, enyi wenye dhambi, na kuisafisha mioyo yenu, enyi wenye nia mbili. Huzunikeni na kuomboleza na kulia. Kucheka kwenu na kugeuzwe kuwa kuomboleza na kulia. Kucheka kwenu na kugeuzwe kuwa kuomboleza, na furaha yenu kuwa hamu. Jidhilini mbele za Bwana, naye atawakuza.

Neno la Bwana… Tumshukuru Mungu.

WIMBO WA KATIKATI

Zab. 55:6-10, 22 (K) 22

(K) Umtwike Bwana mzigo wako naye atakutegemeza, hatamwacha mwenye haki aondoshwe milele.

Nikasema, ningekuwa na mbawa kama njiwa, 

Ningerukia mbali na kustarehe.

Ningekwenda zangu mbali,

Ningetua jangwani. (K)

Ningefanya haraka kuzikimbia

Dhoruba na tufani.

Ee Bwana uwaangamize, uzichafue ndimi zao. (K)

Maana nimeona dhuluma na fitina katika mji

Machana na usiku huzunguka kutani mwake;

Uovu na taabu zimo ndani yake; (K)

Umtwike Bwana mzigo wako naye atakutegemeza,

Hatamwacha mwenye haki aondoshwe milele. (K)

SHANGILIO

Ebr. 4:12

Aleluya, aleluya,

Neno la Mungu li hai tena li nguvu, kuyatambua mawazo na makusudi ya moyo.

Aleluya.

INJILI

Mk. 9: 30 – 37

Yesu na wanafunzi wake wakapita katikati ya Galilaya; naye hakutaka mtu kujua. Kwa sababu alikuwa akiwafundisha wanafunzi wake, akawaambia, Mwana wa Adamu yuaenda kutiwa katika mikono ya watu, nao watamwua; hata akiisha kuuawa, baada ya siku tatu atafufuka. Lakini hawakulifahamu neno lile, wakaogopa kumwuliza.

Wakafika Kapernaumu; hata alipokuwamo nyumbani, akawauliza, Mlishindania nini njiani? Wakanyamaza; kwa maana njiani walikuwa wakibishana wao kwa wao, ni nani aliye mkubwa. Akaketi chini, akawaita wale Thenashara akawaambia, Mtu atakaye kuwa wa kwanza atakuwa wa mwisho kuliko wote, na mtumishi wa wote. Akatwaa kitoto, akamweka katikati yao, akamkumbatia, akawaambia, Mtu akimpokea motto mmoja wa namna hii kwa jina langu, anipokea mimi; na mtu akinipokea mimi, humpokea, si mimi, bali yeye aliyenituma.

Neno la Bwana… Sifa kwako Ee Kristo. 

Copyright © 2024, "MASOMO YA MISA" published by T.M.P. Book Department, Tabora – Tanzania. Readings reproduced by Furaha ya Kikatoliki: see www.fur-kat.blogspot.com.